Luk 19 | GAM | STEP | Jisas dumo Jeriko pakna po molo, alla kere er orko puno dje yeika

Luke 19

Jisas er iwa Sakias numbiye al pi

1 Jisas dumo Jeriko pakna po molo, alla kere er orko puno dje yeika 2 iwa Sakias we dji ta moi. Une ge kog mogoi merke kane noi. Ku takis i una moi ge iwa Sakias ge kantau ye moi. 3 Embe molo Jisas ge iwa ne mal moro dje pille, kanno dje yei ba, une iwa momo namoi; una merke pumaka, une kanda napai. 4 Ge pille, Sakias muk dje er wekle po iko pik ta moi al po mugo molo Jisas wonda kanno dje yei. 5 Une embe yeika, Jisas iko me al wo, kane pla woro kane embe dji, Sakias, ni ola dje er kal we! Ipon na ni numbin al po moyo paro we dji.

6 Embe djika Sakias wo pille, ola dje er kal wo Jisas dje i er yene numbiye al pi. 7 Pika una merke kanmolo Jisas kandjiye amblo embe dji, singare ke yei iwa numbiye al pundo we dji.

8 Una numog po molmaka Sakias aglo molo embe dji, Iwa Kerman, na wal porapora kane noll moro ge na i tuge yem una wal kane nanonj una mor al ge auno, tuge yem nanam ino. Alla, una wal pai, na po kende dje, ngunjo ill mal ge, na alla wal 4-pela i be woro auno! we dji. 9 Une kandja embe djika Jisas Sakias moi al embe dji, God Sakias game wombaye boll ipon i yem wori pora dji. Ge une Abraam wombaye moro. 10 Una er take dje po moi ge Una Wombe dulo i yem worno dje woi we dji.

Una 10-pela bisnis ye ku i mal Jisas kandja buko dji

(Matyu 25.14-30)

11 Jisas kandja embe dji ge una pille, Jisas Jerusalem manda woi dje pille, God dumoye kantau yendo mal ge ola dje pene wonda dje pillmaka, Jisas kane kandja buko ta dje awo, 12 embe dji, iwa kerman ta moi. Une er dumo ellke ta pundaka namba auneke, une iwa kerman king molo er yem wo yene unakye kantau yenda dje pille moi. 13 Molo une djika boiye una 10-pela womaka ku kerman mina ^{▼▼ku kandjiye mina we dji ge, asa una ku fotnait 6-pela molo i mal embe paro.} we dji ge une taimane taiman dje awo embe dji, na ku aundo ge ye ipo bisnis ye moyeke, are yem wo kane ino we dji.

14 Dji ba yene unakye ke kane kandja sigye dje woro embe dji, une ge iwa kerman king namoya, man we dji. 15 Dji ba une er pika namba i aumaka, une iwa kerman king molo, er yem woi.

Wo asa ku awi una moi al djika kambono womaka une embe dji, na ku awill ge ye ipo bisnis ye molo ku namba namba mal i ne? dji. 16 Djika boiye iwa ta asamoll wo embe dji, iwa kerman, ni ku mina taimane ta na awin ge, na ipo bisnis ye molo ku mina 10-pela prais ill we dji. 17 Djika iwa kerman embe dji, ni boi wopake mon. Na ku kembis ni awill ge ni kanpol ton. Ni dumo kerman 10-pela pakna yero ge kantau yemben we dji.

18 Djika boiye iwa ta wo embe dji, iwa kerman, ni na ku mina taimane ta awin ge, na bisnis ye molo ku mina 5-pela ill yero we dji. 19 Une kandja embe djika iwa kerman embe dji, ni dumo kerman 5-pela pakna yero ge kantau yemben we dji.

20 Djika boiye iwa ta are wo embe dji, iwa kerman, ni una dongall mon. Wal napagin ge ni po iden, alla wal nayan ge ni po wallke nonden. Ni embe yen ge na ni pille kand goll. Ni na awin ku ge na kau kulo pagill we dji. Boi ku ge i pene woro, kane! dji. 22 Djika iwa kerman embe dji, ni boi ke mon. Ni kandja ipon djin mal ge na ni kot ye auno. Na wal napagill ge na po ido alla, wal nayall ge wallke nondo dje ni embe pren mo? 23 Ni nomanin embe mal paika ni ku ipo beng al worinka, na ku prais ta illka we dji.

24 Une kandja embe dje kere, una aglo moi al iwa kerman kandja dje embe dji, ku mina ye moro iwa ge, ye ku ge ipo una ku mina 10-pela aune we dji. 25 Djika una embe dji, aumbon ba, une ge ku mina 10-pela yei pora dji we dji. 26 Iwa kerman ge embe dji, na kandja dje ye aundo, iwa ta wal ye moi dal, na wal ta auno ba, iwa ta wal ye namoi dal, kembis ta ye moya ge na i worno. 27 Asa una na ke kane, ni king molo no kantau nayemben we dji una mor ge, ye dje iwo manda ge wo to goyeke nanam kanno we djinda we dji.

Jisas iwa king mal embe molo er Jerusalem pakna pi

(Matyu 21.11 ne, Mak 11.1-11 ne, Jon 12.12-19)

28 Jisas kandja embe dje kere er Jerusalem puno dje er wekle pi. 29 Po dumo Betpasi ne, Betani kamkimb Olip ^{▼▼Iko olip megye pai ge una nonj wal} we dji yei al po kogoye una soka mopill al ge asamoll dje woro embe dji, 30 ye dumo koi ba po kanbell, kog dogi wombe ta una ap to i nawani ge una kaye kolo wori pa moro. Ye po piska to i er wose! dji. 31 I er wombellka una ta molo, ye namba yei pille kog dogi kaye piska tonmell ne dji dal, ye embe djimbell, iwa kerman kogo ta pai pille dogi ge yenda we djimbell we dji.

32 Djika soka po kanpill Jisas kandja dji mal ge kaima pai. 33 Po kog dogi kaye piska topillka kog dogi ne kambono kane embe dji, ye namba yei pille kog dogi kaye piska tonmell ne? dji. 34 Soka embe djipill, Iwa Kerman kogo ta pai, kog dogi ge po yenda we djipill. 35 Dje kere kog dogi ge i er Jisas moi al wopill.

Iwo pagle, allap ne, kon momo i kog dogi mopye al kulo ye, soka amblo pille dje aupillka Jisas dogi al er pla po molo i pi. 36 I pika una kon momo ne, allap gulo i kondwe yei al kulo wori ye pi.

37 Kulo ye pumaka Jisas Jerusalem manda wo moika, kamkimb Olip kondwe er kal puno dje yei al ge, kogoye una merkeke Jisas kogo dongall porapora yei kani mal pille, wo pille yau kerman to, God kandjiye amblo pla woro embe dji, 38 God dje wori woi iwa King wondo ge God ye wopake ye aundambe. Una God boll ellne tukne arngan yenda moyeke, God pla moro una yene kandjiye kerman kaima panda we dji.

39 Kandja embe djimaka Parisi una pende Jisas moi al embe dji, tisa, ni kogen una kandja embe djinj ge ni man djiye! dji. 40 Dji ba Jisas embe dji, na kandja dje ye aundo, kambono yau natoi dal, makimb al ku kiwa moro ge yau tane we dji.

Jisas Jerusalem una pille wandillne golo kimb yei

41 Jisas er Jerusalem manda wo molo una moi ge kane wandillne golo kimb ye 42 embe dji, ye Jerusalem una wal ta kanmaka ye ellne tukne arngan yeika ba wal yei ge seke pai ye nakani pille, 43 ege ta wondaka, kunda yem una wo ye tane. Ga wo makimb wallke woro pla worneke ye i pakna woro kerne. Ye pakna moye una er orko bon dje yene man pandaka, una orko moye una er pakna wombon dje yene man pandaka, ga embe ye molo ye tane. 44 Ye wopake moye dje pille God ye dumo moi al wo moi ba, ye kanpol natoi pille, kunda yem una wo ye to, numbine gullne wamo woro, sellke seke woro, ye wombane boll porapora to golo kerne we dji.

Jisas lotu numb kerman numog po una dje bekle wori

(Matyu 21.12-17 ne, Mak 11.15-19 ne, Jon 2.13-22)

45 Jisas lotu numb kerman gull pai al er pakna po kani, una kog sipsip ne, opa gale ye awinj wal iwo paglmaka, una wo top to God opa aumbon dje ye molmaka une po man dje, to bekle woro 46 embe dji, Baibel al kandja bolo wori paro ge embe djindo, na numbna ge una na pille kamang ye aune numb yero we dje boi ba, ye ye molo i kunumb una numbine mal embe yembon dje pille yenj we dji.

47 Ege ege Jisas lotu numb kerman gull pai al molo una moi al kandja dje awo moi. Moika opa gale awi una kerman ne, God lo dje awi una ne, una kerman kambono Jisas to gopon dje pille moi ba, 48 une kandja dje una awi ge una porapora wopake pille moi, una wo une to gopon dje yei ge kune nayei.